កិច្ចប្រជុំពិភាក្សាស្តីពី “វឌ្ឍនភាពនៃការអនុវត្ត គម្រោង A4S និង គម្រោង SASI” ជាមួយអង្គការហ្គ្រេត (GRET)

(ភ្នំពេញ)៖ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាងដ៏ខ្ពង់ខ្ពស់ ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញដឹកនាំកិច្ចប្រជុំពិភាក្សាស្តីពី “វឌ្ឍនភាពនៃការអនុវត្តគម្រោង A4S និងគម្រោង SASI ” ជាមួយអង្គការហ្គ្រេត (GRET)។
ក្នុងកិច្ចប្រជុំនេះភាគីទាំងពីរបានពិភាក្សា និងពិនិត្យអំពីវឌ្ឍនភាព នៃការអនុវត្តគម្រោង A4S និងគម្រោង SASI ដើម្បីប្រមូលនូវធាតុចូល អនុសាសន៍ និងមតិយោបល់ផ្សេងៗ សម្រាប់អនុវត្តន៍គម្រោងប្រកបដោយប្រសិទ្ធភាពខ្ពស់ និងទទួលបានជោគជ័យ។
សូមរម្លឹកថា៖ ប.ស.ស. អង្គការហ្គ្រេត (GRET) និងទីភ្នាក់ងារបារាំងសម្រាប់អភិវឌ្ឍន៍ (AFD) បានចុះហត្ថលេខាលើ អនុស្សរណៈនៃការយោគយល់គ្នាសម្រាប់អនុវត្តគម្រោងស្តីពី “ការពង្រឹងការបន្សាំរបបធានារ៉ាប់រងសង្គម (SASI)” ក្នុងគោលបំណងដើម្បីសិក្សាសមិទ្ធិលទ្ធភាព សម្រាប់ការអនុវត្តរបបសន្តិសុខសង្គម ដែលបន្សាំទៅនឹងកម្លាំងពលកម្មតាមទីជនបទ និងពង្រឹងសមត្ថភាពស្ថាប័ន ប.ស.ស. ដើម្បីឆ្ពោះទៅរកការពង្រីកការគ្របដណ្តប់របបសន្តិសុខសង្គមសម្រាប់វិស័យកសិកម្មនៅក្នុងការបន្សាំខ្លួនទៅនឹងការ ប្រែប្រួលអាកាសធាតុ។ លើសពីនេះ គម្រោង SASI គឺជាការរួមចំណែកទៅដល់ផែនទីបង្ហាញផ្លូវនៃការ គ្របដណ្តប់សុខភាពជាសកល (UHC Roadmap) ផងដែរ។
សូមបញ្ជាក់ថា៖ កិច្ចប្រជុំពិភាក្សាខាងលើនេះ ប្រព្រឹត្តទៅនារសៀលថ្ងៃទី២៨ ខែមិថុនា ឆ្នាំ២០២៤ នៅស្នាក់ការកណ្តាល ប.ស.ស. រាជធានីភ្នំពេញ ដោយមានការចូលរួមពីថ្នាក់ដឹកនាំ មន្ត្រី និងបុគ្គលិកនៃនាយកដ្ឋានជំនាញ នៃ ប.ស.ស. ព្រមទាំងតំណាងអង្គការហ្គ្រេត (GRET) ប្រមាណជា ២០រូប៕