ជាង ៣២០ស្ថាប័ន ដែលមកពី ១៦០ប្រទេស ផ្សេងៗគ្នា ចូលរួមក្នុងសិក្ខាសាលាដ៏សំខាន់មួយ តាមរយៈប្រព័ន្ធអនឡាញ នាល្ងាចនេះ ដែលក្នុងនោះ ក៏មាន ប.ស.ស. កម្ពុជា ផងដែរ

(ភ្នំពេញ)៖ នាល្ងាចថ្ងៃព្រហស្បតិ៍ ទី១០ ខែមីនា ឆ្នាំ២០២២ នេះ ថ្នាក់ដឹកនាំ ព្រមទាំងមន្រ្តីបច្ចេកទេស តំណាងឱ្យបេឡាជាតិសន្តិសុខសង្គម (ប.ស.ស.) កម្ពុជា ក្នុងនាមស្ថាប័នដែលត្រៀមចូលជាសមាជិក នៃសមាគមសន្តិសុខសង្គមអន្តរជាតិ (International Social Security Association, ISSA) ដឹកនាំដោយឯកឧត្តម ហេង សុផាន់ណារិទ្ធ អគ្គនាយករង ប.ស.ស. និងជាតំណាងដ៏ខ្ពង់ខ្ពស់ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម (ប.ស.ស.) បាន ចូលរួមសិក្ខាសាលាដ៏មានសារៈសំខាន់មួយ ស្តីពី “ការពង្រីកកិច្ចគាំពារសង្គមសម្រាប់ពលករទេសន្តរប្រវេសក៍ ជនភៀសខ្លួន និងសមាជិកគ្រួសារ៖ ការណែនាំសម្រាប់អ្នកបង្កើតគោលនយោបាយ និងអ្នកអនុវត្តន៍” តាមរយៈប្រព័ន្ធអនឡាញ។
តាមការបញ្ជាក់ពីសំណាក់ឯកឧត្តមអគ្គនាយករង ប.ស.ស. បានឱ្យដឹងថា៖ សិក្ខាសាលាខាងលើនេះ បានពិភាក្សា ដោយផ្តោតលើចំណុចសំខាន់ៗ មួយចំនួន រួមមាន (១) ដំណោះស្រាយ បញ្ហាប្រឈមដល់ពលករទេសន្តរប្រវេសក៍ក្នុងការទទួលបានកិច្ចគាំពារសង្គមនៅក្នុងប្រទេសទទួល និងនៅពេលត្រឡប់ទៅប្រទេសកំណើតរបស់ខ្លួនវិញ (២) ការបង្ហាញអំពីវិធីសាស្ត្រផ្សេងៗ ក្នុងការពង្រីកកិច្ចគាំពារសង្គមដល់ពលករទេសន្តរប្រវេសក៍ និងសមាជិកគ្រួសារ (៣) ការពិភាក្សាអំពីជម្រើសគោលនយោបាយ ដែលបានបង្ហាញនៅក្នុងការណែនាំ ដោយផ្អែកលើបទពិសោធន៍ និងការអនុវត្តថ្នាក់ជាតិ
និង (៤) ការបង្ហាញអំពីទស្សនៈរបស់តំណាងកម្មករនិយោជិត និងនិយោជកលើខ្លឹមសារនៃការណែនាំ និងជម្រើសគោលនយោបាយ។
សូមបញ្ជាក់ថា៖ សិក្ខាសាលាខាងលើនេះ រៀបចំឡើងដោយសមាគមសន្តិសុខសង្គមអន្តរជាតិ (ISSA) ដោយមានការចូលរួមពីតំណាងស្ថាប័នសន្តិសុខសង្គមជាសមាជិក នៃសមាគមសន្តិសុខសង្គមអន្តរជាតិ (ISSA) ជាង ៣២០ស្ថាប័ន ដែលមកពី ១៦០ប្រទេស ផ្សេងៗគ្នា ព្រមទាំងមានការចូលពីសមាសភាពត្រីភាគីរបស់អង្គការអន្តរជាតិខាងការងារ (ILO) ទីភ្នាក់ងារដៃគូរបស់អង្គការសហប្រជាជាតិ អង្គការក្រៅរដ្ឋាភិបាល (NGOs) និង អ្នកសិក្សាស្រាវជ្រាវ និងដៃគូអភិវឌ្ឍន៍ជាច្រើនរូបផងដែរ៕