(ភ្នំពេញ)៖ នាព្រឹកថ្ងៃទី៣១ ខែមីនា ឆ្នាំ២០២៥ ឯកឧត្ដមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានចូលរួមកិច្ចប្រជុំកំពូលវាយនភណ្ឌសកលនៅកម្ពុជា (Cambodia Global Textile Summit) ដែលប្រព្រឹត្តទៅក្រោមអធិបតីភាព ឯកឧត្តម ស៊ុន ចាន់ថុល ឧបនាយករដ្ឋមន្រ្តី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងមានវត្តមាន ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ អញ្ជើញថ្លែងសុន្ទរកថា ដែលមានអ្នកចូលរួមសរុបប្រមាណជា ៣០០រូប។
កិច្ចប្រជុំកំពូលនេះ ប្រព្រឹត្តទៅរយៈពេល ២ថ្ងៃ ចាប់ពីថ្ងៃទី៣១ ខែមីនា ដល់ថ្ងៃទី១ ខែមេសា ឆ្នាំ២០២៥ ដែលជាវេទិកាដ៏មានសារៈសំខាន់ក្នុងការផ្ដល់ឱកាសភ្ជាប់ទំនាក់ទំនង និងកិច្ចពិភាក្សាក្នុងចំណោមភាគីពាក់ព័ន្ធនៃវិស័យឧស្សាហកម្ម ដើម្បីរៀបចំអនាគត និងជំរុញវិស័យកាត់ដេរ ស្បែកជើង និងផលិតផលធ្វើដំណើររបស់កម្ពុជា ឱ្យកាន់តែល្អប្រសើរប្រកបដោយនិរន្តរភាព និងការទទួលខុសត្រូវខ្ពស់។
កិច្ចប្រជុំកំពូលខាងលើនេះ មានកិច្ចពិភាក្សាពីវាគ្មិនជាតិ និងអន្តរជាតិ ព្រមទាំងសមាសភាពចូលរួមពីតំណាងរាជរដ្ឋាភិបាល តំណាងវិស័យឧស្សាហកម្ម តំណាងនិយោជក និងដៃគូអភិវឌ្ឍន៍ ដែលសហការរៀបចំដោយសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC), គម្រោងរោងចក្រកាន់តែប្រសើរនៅកម្ពុជា (BFC), កិច្ចសហប្រតិបត្តិការអាល្លឺម៉ង់ (GIZ), និងសភាពាណិជ្ជកម្មអឺរ៉ុបប្រចាំនៅកម្ពុជា (EuroCham Cambodia) ៕
