(កោះកុង) ៖ នាព្រឹកថ្ងៃទី១៤ ខែសីហា ឆ្នាំ២០២៤ នេះ ឯកឧត្តម អេត បូរ៉ាត់ អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងបញ្ជាក់យ៉ាងច្បាស់ថា សម្រាប់សហព័ទ្ធ ជាប្រពន្ធរបស់មន្រ្ដីសាធារណៈ ក៏អាចទទួលបានប្រាក់បំណាច់លំហែមាតុភាពនៅពេលសម្រាលកូនផងដែរ។
ការថ្លែងឡើងបែបនេះក្នុងឱកាសដែល ឯកឧត្តមអគ្គនាយករង អញ្ជើញជាសហធិបតីជាមួយឯកឧត្តម ស្រេង ហុង អភិបាលរង នៃគណៈអភិបាលខេត្តកោះកុង និងឯកឧត្តម ផៃធូន ផ្លាមកេសន សមាជិកក្រុមប្រឹក្សាខេត្តកោះកុង នៅក្នុងពិធីផ្សព្វផ្សាយការអនុវត្តរបបសន្ដិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តសម្រាប់អ្នកក្នុងបន្ទុកសមាជិក ប.ស.ស. ជាមន្រ្តីសាធារណៈ ជូនដល់មន្រ្តីរាជការក្រោមឱវាទរដ្ឋបាលខេត្តកោះកុង ដោយមានអ្នកចូលរួមប្រមាណជា៣០០នាក់។
ឯកឧត្តមអគ្គនាយករង ប.ស.ស. បានបន្ថែមទៀតថា សម្រាប់អ្នកក្នុងបន្ទុកសមាជិក ប.ស.ស. ជាមន្ត្រីសាធារណៈ ដែលរួមមាន សហព័ទ្ធ (ប្ដី ឬប្រពន្ធ) និងកូនៗក្នុងបន្ទុក នៅពេលដែលចុះឈ្មោះជាសមាជិក ប.ស.ស. ក្នុងផ្នែកថែទាំសុខភាពតាមរបបភាគទានដោយស្ម័គ្រចិត្ត ពួកគាត់អាចទទួលបានសេវាព្យាបាល និងថែទាំវេជ្ជសាស្ត្រ នៅមន្ទីរពេទ្យរដ្ឋ ឬមន្ទីរពេទ្យឯកជននានា ដែលជាដៃគូ ប.ស.ស. នៅទូទាំងប្រទេស។
ឯកឧត្តមអគ្គនាយករង ប.ស.ស. បានបន្តទៀតថា បេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ បាននិងកំពុងបំពេញតួនាទី និងភារកិច្ចរបស់ខ្លួន ប្រកបដោយភាពទន់ភ្លន់ និងច្បាស់លាស់ ដើម្បីអនុវត្តកម្មវិធីគោលនយោបាយរបស់រាជរដ្ឋាភិបាល ក្នុងការជួយសម្រួលបន្ទុកដល់មន្ត្រីសាធារណៈ បងប្អូនកម្មករនិយោជិតក្នុងវិស័យឯកជន បុគ្គលស្វ័យនិយោជន៍ និងក្រុមគោលដៅផ្សេងៗ ឱ្យទទួលបានការគាំពារយ៉ាងពេញលេញលើអត្ថប្រយោជន៍របបថែទាំសុខភាព ដើម្បីធានាបាននូវសន្ដិសុខប្រាក់ចំណូលសម្រាប់ជីវភាពគ្រួសារ។
ជាមួយគ្នានោះ ឯកឧត្តមអភិបាលរងខេត្ត ក៏បានសំណូមពរដល់ មន្ទីរ និងអង្គភាពពាក់ព័ន្ធជុំវិញខេត្ត ត្រូវចូលរួមសហការអនុវត្តច្បាប់ស្តីពីរបបសន្តិសុខសង្គមឱ្យទទួលបានប្រសិទ្ធភាព តម្លាភាព គណនេយ្យភាព និងជួយផ្សព្វផ្សាយណែនាំបន្តទៅដល់មន្រ្ដីរាជការគ្រប់រូប ឱ្យនាំអ្នកដែលស្ថិតក្នុងបន្ទុករបស់ខ្លួនទៅចុះឈ្មោះចូលជាសមាជិក ប.ស.ស. នៅទីតាំងសាខា ប.ស.ស. ដែលនៅជិតបំផុតដើម្បីទទួលបានអត្ថប្រយោជន៍របបសន្តិសុខសង្គមទាំងអស់គ្នា៕
