(ភ្នំពេញ)៖ ដោយទទួលបានចាត់តាំងពីសំណាក់ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី១៩ ខែមិថុនា ឆ្នាំ២០២៤នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានផ្តល់កិច្ចសម្ភាសន៍ពិសេសជាមួយអ្នកសារព័ត៌មានកម្ពុជាថ្មី ក្រោមប្រធានបទ «សន្ទុះនៃការចុះឈ្មោះជាសមាជិកភាពនៅបេឡាជាតិសន្តិសុខសង្គម (ប.ស.ស.)»។
ក្នុងការផ្តល់សម្ភាសន៍នេះ ឯកឧត្តមបណ្ឌិតអគ្គនាយករង ប.ស.ស. បានផ្ញើសារអំពាវនាវដល់សមាជិក ប.ស.ស. សូមចាត់ទុកប័ណ្ណសមាជិក ប.ស.ស. ជាប័ណ្ណដ៏មានសារៈសំខាន់ ដែលអាចជាធនាគារមួយនៅក្នុងគ្រួសារលើការចំណាយថ្លៃពេទ្យ ដែលលែងបារម្ភពីការលក់ទ្រព្យសម្បត្តិ ឬខ្ចីបុលអ្នកដទៃ ឬស្ថាប័នហិរញ្ញវត្ថុ ដែលមានហានិភ័យខ្ពស់ សម្រាប់ការព្យាបាលជំងឺ។
ក្នុងកិច្ចសម្ភាសនាថ្ងៃនេះ ឯកឧត្តមបណ្ឌិតអគ្គនាយករង ប.ស.ស. បានបញ្ជាក់បន្ថែមថា សន្ទុះនៃការចុះឈ្មោះជាសមាជិក ប.ស.ស. សម្រាប់បុគ្គលស្វ័យនិយោជន៍ និងអ្នកក្នុងបន្ទុកនៅទូទាំងប្រទេសមានចំនួនប្រមាណជា ២ ៥០០នាក់ក្នុងមួយថ្ងៃ ហើយគិតត្រឹមថ្ងៃទី១៨ ខែមិថុនា ឆ្នាំ២០២៤ បេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ មានសមាជិកចំនួន ២,២លាននាក់ ក្នុងចំណោមនោះសមាជិក ប.ស.ស. ជាបុគ្គលស្ថិតក្រោមវិស័យសាធារណៈជាង ៤៣ម៉ឺននាក់ បុគ្គលស្ថិតក្រោមបទប្បញ្ញត្តិច្បាប់ស្តីពីការងារជាង ១,៥លាននាក់ និងបុគ្គលស្វ័យនិយោជន៍ ២២ម៉ឺននាក់ ព្រមទាំងអ្នកក្នុងបន្ទុកសមាជិក ប.ស.ស. ៦,៦ម៉ឺននាក់ ដែលកំពុងមានសិទ្ធិទទួលបានអត្ថប្រយោជន៍នៃរបបសន្តិសុខសង្គម។
បើតាមប្រសាសន៍របស់ឯកឧត្តមបណ្ឌិតអគ្គនាយករង ប.ស.ស. គិតចាប់ពីការដាក់ដំណើរការរបបសន្តិសុខសង្គមផ្នែកថែទាំសុខភាពក្នុងឆ្នាំ២០១៨ មកដល់បច្ចុប្បន្ននេះ មានសមាជិកចូលប្រើប្រាស់ ជាង ១៧,៥លានករណី ហើយបើគ្រាន់តែគិតក្នុងឆ្នាំ២០២៣កន្លងទៅនេះ មានសមាជិក ប.ស.ស. ចូលប្រើប្រាស់ ជាង ៥លានករណី ដែល ប.ស.ស. ត្រូវរ៉ាប់រងលើចំណាយមន្ទីរពេទ្យ៕
