រាជធានីភ្នំពេញ៖ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជានាយក ប.ស.ស បានឱ្យដឹងថា ច្បាប់ស្តីពីរបបសន្តិសុខសង្គម នៃព្រះរាជាណាចក្រកម្ពុជា នឹងដាក់ឱ្យអនុវត្តក្នុងពេលឆាប់ៗខាងមុខនេះ ដែលមានវិសាលភាពគ្រប់ដណ្តប់លើ បុគ្គលក្នុងវិស័យសាធារណៈ បុគ្គលក្រោមច្បាប់ការងារ នាវាសមុទ្រ និងអ្នកបម្រើតាមផ្ទះ និងបុគ្គលស្វ័យនិយោជន៍។
ឯកឧត្តមប្រតិភូរាជរដ្ឋាភិបាល បានលើកឡើងយ៉ាងដូច្នេះ ក្នុងកិច្ចប្រជុំពិនិត្យ និងកែសម្រួលខ្លឹមសារលើសេចក្តីព្រាងច្បាប់ស្តីពីរបបសន្តិសុខសង្គម ជាមួយប្រធានសហព័ន្ធនិយោជក និងសមាគមពាណិជ្ជកម្មកម្ពុជា នាថ្ងៃព្រហស្បតិ៍ ១០កើត ខែបឋមាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២១ ខែមិថុនា ឆ្នាំ២០១៨ នៅសាលប្រជុំបេឡាជាតិរបបសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ។
ឯកឧត្តមប្រតិភូរាជរដ្ឋាភិបាល សង្ឃឹមយ៉ាងមុតមាំថា សេចក្តីព្រាងច្បាប់ស្តីពីរបបសន្តិសុខសង្គម នេះ នឹងធ្វើឱ្យបុគ្គល ដែលស្ថិតនៅក្រោមច្បាប់ស្តីពីរបបសន្តិសុខសង្គមនេះ នឹងជួយឱ្យជីវភាពរបស់កម្មករនិយោជិត នៅពេលចាស់ជរាអាចចិញ្ចឹមខ្លួនឯងបាន ដោយមិនចាំបាច់ពឹងផ្អែកលើកូនចៅ។
